Rebbi kemur að Músapésa snöktandi
Rebbi: Músapési, hvað er að?
Músapési: Æ, Rebbi ég get ekki talað um það.
Rebbi: Ekki einu sinni við gamlan Ref?
Músapési: Nei, mér líður svo illa.
Rebbi: Þá er gott að tala við einhvern.
Músapési: Jaaááá, en ég held að ég geti ekki sagt frá því.
Rebbi: Nú, gerðist eitthvað?
Músapési: Já…
Rebbi: Hvað?
Músapési: …alveg hræðilegt.
Rebbi: Gáðu hvort þér líður ekki betur ef þú segir mér frá því.
Músapési: Sko…hérna…ég hérna…
Rebbi: Já, ég er að hlusta.
Músapési: Ég plataði Mýslu alveg svakalega og nú elskar Jesú mig ekki lengur (byrjar að gráta.)
Rebbi: Hvað ertu að segja!?
Músapési: Já, ég veit…þetta er hræðilegt.
Rebbi: Ég skil vel að þér líði illa, en á ég að segja þér svolítið?
Músapési: Hvað? (Snöktir.)
Rebbi: Ég held að þú sért á villigötum.
Músapési: Já, ég er algjör lygalaupur.
Rebbi: Nei, það var nú ekki það sem ég átti við.
Músapési: Hvað þá?
Rebbi: Ég held að þú sért búinn að gleyma hvað Jesú elskar þig mikið.
Músapési: Heldur þú að honum þyki ennþá vænt um mig?
Rebbi: Ég held ekkert um það, ég er handviss um það.
Músapési: Hvernig getur þú verið svona viss?
Rebbi: Manstu eftir laginu „Elska Jesú er svo dásamleg?“
Músapési: Já…
Rebbi: (Syngur.) „Svo há að þú kemst ekki yfir hana“…Syngdu með!
Músapési: Svo djúp þú kemst ekki undir hana.
Rebbi: …Svo víð þú kemst ekki út úr henni, elska svo dásamleg!
Músapési: Ég kann þetta lag alveg.
Rebbi: Þá þarftu að fara vel með textann.
Músapési: Af hverju?
Rebbi: Hann segir allt sem þú þarft að vita núna.
Músapési: Nú?
Rebbi: Já…Það er nefnilega svoleiðis að Jesú elskar þig svo mikið að þú kemst aldrei út úr elsku hans.
Músapési: Jaaáááá, ertu að segja að Jesú hætti aldrei að elska mig?
Rebbi: Einmitt!
Músapési: Alveg sama hvað ég geri?
Rebbi: Já, en honum finnst það samt mjög leiðinlegt þegar þú ert að plata.
Músapési: Hvað get ég þá eiginlega gert!
Rebbi: Beðið Jesú fyrirgefningar á því að hafa verið að plata systur sína.
Músapési: Auðvitað!
Rebbi: Svo þarftu að fara til Mýslu, segja henni að þú hafir verið að plata og biðja hana fyrirgefningar.
Músapési: Já það er rétt hjá þér.
(Rebbi kinkar kolli.)
Músapési: Þá er best að ég drífi mig af stað.
Rebbi: Gerðu það, og gleymdu aldrei hvað Jesús elskar þig heitt.
Músapési: Það geri ég örugglega ekki aftur.