Sjá myndaseríu fyrir skjávarpa í viðhenginu hér neðst á síðunni. Best er að vista myndaseríuna í tölvuna áður en hún er sýnd.
Þau sem ekki hafa aðgang að skjávarpa mega ljósrita myndirnar og sýna börnunum þær þannig.
Þið kannist ábyggilega öll við sálminn Heims um ból. Hann er sunginn á jólunum um allan heim. Eigum við að prófa að syngja hann saman?
Það mætti halda að þessi sálmur hafi alltaf verið til en það er að sjálfsögðu ekki þannig.
Sagan hófst á ísköldu aðventukvöldi. Og ég veit ekki hvort þið trúið mér, en það var pínulítilli svangri mús að þakka að þessi fallegi og frægi jólasálmur varð til.
Kíkjum á þetta betur. Gefum litlu músinni orðið.
1. Hugsið ykkur bara hvað það er erfitt að vera svöng mús. Já og það meira að segja á sjálfum jólunum. Ég skammaðist mín svakalega mikið þegar ég neyddist til þess að fara að naga orgelið í kirkjunni. En þótt orgel sé kannski ekki matur, þá er hægt að gera sér mat úr ýmsu þegar maður er svangur. Ég áttaði mig á því að neðst á orgelinu eru pokar úr leðri. Leður er hægt að borða ef maður er alveg rosalega svangur.
2. Það var ekki fyrr en organistinn kom og ætlaði að fara að æfa sig á orgelið fyrir jólamessuna að það gerðist. Hann settist við orgelið og setti fótinn á fótstigið sem er notað til að blása lofti í það svo það geti spilað og þá kom í ljós að ég var búin að skemma orgelið.
3. En ég ætlaði reyndar ekki að skemma neitt. Þetta var bara neyð. Ég vissi það ekki áður en ég veit það núna að ef maður nagar gat á leðurpokana sem eru á orgelum, þá er bara ekkert hægt að spila á þau. Í staðinn fyrir tignarlega hljóma og tóna koma bara hljóð eins og pffff tffff pffff og það er ekki fallegt. Í staðinn fyrir að allt loftið færi upp í orgelpípurnar, fór það bara út um gatið sem ég hafði nagað og beint framan í mig!
4.Aumingja organistinn, sem hét reyndar Franz Gruber, horfði ráðþrota á orgelið.
5. Í því kom presturinn, Jósef Mohr inn í kirkjuna. Franz organisti, sagði honum hvernig orgelið léti. -Heldurðu að það sé hægt að gera við orgelið fyrir miðnæturmessuna, spurði hann en presturinn var viss um að það væri engin von til þessi.
6. En þeir ákváðu samt að skoða orgelið betur og sjá hvað væri að. Og það var þá sem allt komst upp. Þeir komu auga á mig, sökudólginn og gatið sem ég hafði nagað á belginn. Ég hef aldrei verið svona hrædd á ævinni. En þeir létu mig vera. Þeir höfðu greinilega annað og mikilvægara að gera en að eltast við mýs.
7. Ég heyrði þá tala saman og ég herti upp hugann og kíkti til þess að sjá betur.
– Heyrðu Jósef, sagði organistinn við prestinn. Hvernig í ósköpunum eigum við að fara að því að halda miðnæturmessu þegar við höfum ekkert orgel til að spila á? Presturinn klóraði sér í höfðinu og sagði svo:- Tjah…ég veit það ekki…Hmmm.
8. Svo var eins og allt í einu hefði kviknað á perunni hjá prestinum. – Heyrðu Franz, sagði hann. Ég hef ort kvæði. – Og?…, sagði Frans. -Nú þú ert svo mikill hæfileika maður að ég er viss um að þú getur búið til lag við kvæðið. Síðan getum við tveir sungið það með barnakórnum og þú spilað undir á gítar.
9.Og nú tók organistinn Franz fram gítar og byrjaði að semja lag við kvæðið.
Fljótlega gat ég heyrt lag út úr þessu hjá honum og þeir fóru báðir að syngja, hann og presturinn. Þetta var fallegasti jólasálmur sem ég hef nokkru sinni heyrt og hef ég nú heyrt þá marga, enda er ég kirkjumús! Hann hljómaði svona: Heims um ból, helg eru jól!
10. Brátt mættu krakkarnir í barnakórnum. Franz og Jósef kenndu krökkunum lagið og þau voru enga stund að læra það. Það var eins og þetta lag hefði alltaf verið til.
Þegar fólk mætti til messunnar fékk það að heyra nýja sálminn. Allir urðu stórhrifnir af sálminum- svo hrifnir að sálmurinn er orðinn frægur út um allan heim.
11.Já og mörgum finnst jólin ekki vera komin fyrr en þessi sálmur hefur verið sunginn.
Og allt mér að þakka. Litlu músinni sem beit gat á orgelbelginn.
Nú skulum við syngja þennan sálm saman.
Texti og teikningar: Elín Elísabet Jóhannsdóttir 2011