Töfrapokinn er til í mörgum kirkjum. En fæst einnig í Kirkjuhúsinu.
Grænn
Dag nokkurn sagði Jesús við lærisveina sína: – Farið til bóndans þarna og fáið asnann hans lánaðan. Lærisveinarnir vissu ekki hvað Jesús ætlaði að gera við lítinn asna en þeir gerðu það sem hann bað þá um.
Jesús settist á asnann og reið inn í borg sem hét Jerúsalem.
Í Jerúsalem var fjöldi manns. Þegar fólkið sá Jesú koma ríðandi á asna, hrópaði það upp yfir sig af gleði. Sumir fóru úr yfirhöfnunum og lögðu þær á götuna svo Jesús og asninn þyrftu ekki að stíga fæti sínum á harða jörð. Aðrir rifu greinar af pálmatrjánum og veifuðu þeim eins og fánum eða lögðu þær á götuna. Allir hrópuðu einum rómi: Blessaður sé sá sem kemur í nafni Drottins!
Þetta var á pálmasunnudag.
Svartur
Föstudagurinn langi rann upp. Það var dagurinn sem Jesús var krossfestur.
Það er erfitt að skilja hvers vegna mönnunum datt í hug að krossfesta Jesú sem var svo góður. En Jesús sagði við Guð, föður sinn: – Faðir, fyrirgef þeim, því þeir vita ekki hvað þeir eru að gera.
Jesús er tilbúinn til að fyrirgefa öllum.
Rauður
Hann dó á krossinum. Sagt er að hann hafi úthelt blóði sínu fyrir okkur mannfólkið.
Hvítur
Þegar Jesús var dáinn, tóku vinir hans hann niður af krossinum, vöfðu hann í líkklæði og settu hann inn í gröf.
Síðan var stórum steini velt fyrir grafaropið.
Vinir Jesú hljóta að hafa verið mjög sorgmæddir.
Gulur
Á páskadagsmorgun fóru nokkrar konur að gröf Jesú.
Þær voru með blóm og ilmsmyrsl.
Þær ætluðu að smyrja líkama Jesú, eins og siður var að gera í þeirra landi.
Þegar þær komu að gröfinni, sáu þær að steininum hafði verið velt frá.
Þær flýttu sér inn í gröfina og sáu að gröfin var tóm.
Jesús var ekki þar!
Allt í einu stóðu englar hjá þeim og sögðu þeim að Jesús væri ekki lengur dáinn, heldur lifandi!
Þá skildu þær hvað hafði gerst. Jesús hafði stigið frá dauðanum yfir til lífsins! Hann sigraði dauðann. Konurnar hlupu eins og fætur toguðu til lærisveina Jesú og sögðu þeim þessar góðu fréttir.
Jesús segir: Ég er upprisan og lífið. Sá sem trúir á mig mun lifa þótt hann deyi.