Hjálpargögn Rebbi og Mýsla. Sólgleraugu, vasaljós og bómull.
Rebbi (Kemur syngjandi inn með ljós í hendinni) . . . Sjá við göngum í ljósi Guðs. Sjá við göngum í ljósi Guðs. Krakkar! Allir að syngja með . . . sjá við göngum í ljósi Guðs . . .
Mýsla (Kemur inn með sólgleraugu) Halló krakkar! Vá! Hvað þið syngið vel.
Rebbi dúmm de dúmm . . . finnst þér það ekki og sjáðu ljósið mitt (sveiflar ljósinu) vúhhúú!
Mýsla Ekki lýsa svona í augun á mér. Það er svo vont fyrir augun. Ái æi oj . . . ég er með bágt í augunum.
Rebbi Ha! Hvað er að og af hverju ertu með sólgleraugu?
Mýsla Ég vaknaði í morgun og gat ekki opnað augun. Ég var með grænt slím í augunum og ég er bara svo aum. Ó æi!
Rebbi Ojjjbara ullabjakk . . . grænt slím!
Mýsla Ég gat varla opnað augun í morgun. Það var svooo vont og það er ennþá slím í augunum á mér.
Rebbi Æi aumingja þú Mýsla. Þú hefur bara verið alveg blind og labbað um eins og draugur með slím í augunum. Krakkar, hafið þið fengið svona slím í augun? (Leyfa börnunum að svara)
Mýsla Æi þetta var mjög sárt og þess vegna er ekki gott að fá svona sterkt ljós í augun. Ljósið þitt er samt flott Rebbi.
Rebbi Takk Mýsla. Ég fékk það gefins í gær. Ég bjó til frábæran leik sem mig langaði til að fara í. Viltu vera með okkur í leiknum?
Mýsla Já ég væri alveg til í að vera með, en ég ætlaði að athuga hvort þú gætir verið miskunnsamur og hjálpað mér smá?
Rebbi Auðvitað vil ég hjálpa þér Mýsla. Hvað viltu að ég geri fyrir þig?
Mýsla Gætirðu hjálpað mér að hreinsa aðeins betur augun svo að ég geti séð betur og verið með í leiknum?
Rebbi Ha!? Viltu að ég Rebbi hjálpi þér að hreinsa þetta ógeðslega græna slím úr augunum á þér? Ég kann það ekkert.
Mýsla Jú þú getur það alveg. Ég er með heitt vatn og bómul svo að þetta er ekkert mál.
Rebbi (hikar og setur upp fýlusvip) Ööööö . . .
Mýsla Krakkar viljið þið hjálpa mér?
Rebbi Nei! Nei ég get alveg hjálpað þér Mýsla. Ég kann þetta alveg, en þetta er svolítið ógeðslegt. (Hjálpar Mýslu að hreinsa augun)
Mýsla Ó Æ hvað þetta er vont, en það er gott að þú hjálpar mér Rebbi svo að ég geti verið með í leiknum þínum. . . . Já nú líður mér miklu betur og þarf ekki að nota sólgleraugun. Takk Rebbi!
Rebbi uhh ekkert að þakka (hryllir sig og hendir bómulinum frá sér)
Mýsla Ég veit að þetta er ekki fallegt, en þú varst nú góður við mig að hjálpa mér Rebbi.
Rebbi Takk Mýsla. Ég vona að ég fái ekki martröð í nótt og dreymi grænt slím (leikur draug) Vúhh!
Mýsla Þetta var nú ekki svo slæmt. Hættuessu Rebbi! Þú ert ekkert sniðugur að stríða mér svona.
Rebbi Vúhhú! (heldur áfram með draugalætin) Ég er Mýsla draugur með grænt slím . . .
Mýsla Ókei ókei . . . Hvernig er leikurinn sem þú ætlaðir að kenna okkur Rebbi?
Rebbi Hehehe æi ég ætlaði ekki að stríða þér. Ég er glaður að geta hjálpað þér, ég þarf líka stundum hjálp með mitt appelsínugula slím. Viltu fyrirgefa mér?
Mýsla Já, þú ert góður vinur. Hvernig var aftur leikurinn?
Rebbi Ég ætla að láta ljósið mitt skína á einhvern hlut og þið eigið að vera eins snögg og þið getið að segja hvað hluturinn heitir. Ok allir tilbúnir . . . einn tveir og byrja!
(Farið í leikinn í smá stund, eftir leikinn)
Rebbi og Mýsla Bless krakkar það var gaman að leika við ykkur. Sjáumst næsta sunnudag.
