Höfundur: Thorleifur Einarsson

Þessi útgáfa af Örkinni hans Nóa leggur áherslu á regnbogann og að allir ólíkir litir hans minna okkur á að öll erum við jafn mikilvæg og elskuð í augum Guðs; dýr og fólk af öllum stærðum og gerðum. Regnboginn er því ekki einungis sáttmáli um að aldei aftur komi mikið flóð heldur líka samkomulag um að saman eigum við að búa til heim þar sem við fáum öll að njóta okkar eins og við erum ,,Í öllum litum regnbogans.“

ÖRKIN HANS NÓA

Einu sinni var maður sem hét Nói. Hann var duglegur og góður. Fólkið í kringum hann var hins vegar eigingjarnt og hugsaði lítið um aðra.

Dag einn sagði Guð við Nóa að mikið flóð væri að koma yfir jörðina og að hann yrði að byggja stóra og mikla Örk til að bjarga sér og dýrunum.

(Gott að spyrja krakkana hvort þau viti hvað Örk er – Rétt svar: Stórt skip)

Nói byrjaði að byggja örkina og fólkið sem sá hann byggja hana hló að Nóa og sagði að hann væri ruglaður að byggja örk – (stórt skip) inni í miðju landi. Nói sagði þeim að það væri að koma flóð og þau yrðu að passa sig.

Síðan fór Nói og fann tvö dýr af hverri tegund eins og Guð hafði beðið hann um, dýr af öllum stærðum og gerðum:

(Gaman að fá börnin til að nefna dýrategundir sjálf og/eða leika þau)

Stór og mikil dýr eins og flóðhesta og fíla, meðalstór dýr eins og zebrahesta og krókódíla. Lítil dýr eins ketti og grísi og svo pínkulítil dýr eins og mýs og fiðrildi.

Það tók Nóa ábyggilega langan tíma að finna öll dýrin. En þegar hann hafði komið öllum dýrunum fyrir í örkinni byrjaði að rigna og það rigndi svo mikið að flóð kom yfir jörðina og Nói og fjölskylda hans sigldu um í 40 daga og 40 nætur. Þegar rigningin hætti sendi Nói dúfu af stað til að athuga hvort hún finndi land sem þau gætu búið í. Dúfan kom til baka með lauf af ólífutré í gogginum. Þá vissi Nói að dúfan hefði fundið þurrt land. Skömmu eftir það birtist regnbogi á himninum en regnboginn er tákn frá Guði að aldrei aftur muni koma svona mikið flóð og að náttúran og dýrin skipti máli.

Regnboginn og allir ólíkir litir hans minna okkur þannig á að öll erum við jafn mikilvæg og elskuð í augum Guðs. Dýr og fólk af öllum stærðum og gerðum. Saman eigum við að búa til heim þar sem við fáum öll að njóta okkar eins og við erum  ,,Í öllum litum regnbogans“. Við þurfum því að fara vel með náttúruna og passa upp að það sé til nægur matur handa öllum og hreint og gott loft.

Eldra efni: ↓
Börnin stíga inn í biblíusöguna: Örkin hans Nóa

Sækja í bestu gæðum (HD) Sækja í minni gæðum (SD)

Í þessum þætti er unnið með dæmisöguna um húsið á bjarginu (Matteus 7.21-29). Nebbi er í vandræðum með að finna öruggan stað fyrir brothætta húsið sitt.

———————————————————————————

SMELLIÐ HÉR! Mikilvægar upplýsingar um Nebbaþættina.

Kennsluleiðbeiningar – 1. Húsið

1. hluti sýndur
Í þessum þætti er unnið með dæmisöguna um húsið á bjarginu (Matteus 7.21-29). Nebbi er í vandræðum með að finna öruggan stað fyrir brothætta húsið sitt.

Á milli þáttahlutanna
Leikur – Jafnvægislist: Fáið krakkanna til að standa á tveimur fótum og síðan að prófa að lyfta öðrum upp og standa á einum fæti. Til að gera þetta ennþá erfiðara má láta krakkana því næst standa á tám á tveimur fótum og reyna hvort þau getið staðað á tám á einum fæti.

2. hluti sýndur
Í seinni hluta þáttanna hjálpa börnin Nebba með því að hoppa.

Umræðupunktar
Spurning: Hvort var auðveldara að standa á öðrum fæti eða í báða fætur?
Svar: Það er öruggara að standa í báða fætur af því að tveir fætur eru sterkari en einn og jafnvægið er betra.

Spurning: Munið þið eftir mönnunum í Biblíusögunni sem fóru að byggja hús? Hvort er betra að byggja hús á sandi eða bjargi?
Svar: Betra að byggja hús á bjargi af því að bjargið stendur fast eins og tveir fætur og hreyfist ekki eins og sandurinn. Bjargið í sögunni er líking fyrir Jesú. Að trúa á hann er góð undirstaða í lífinu og ráðin og loforðin sem Guð gefur í Biblíunni eru traust eins og bjarg.

Spurning: Hvað gerði Nebbi til þess að búa til öruggan stað fyrir húsið sitt?
Svar: Hann fann bók sem smellpassaði undir fótinn og var ekki mjúk eins og bananinn. Nebbi sá að þetta var góð undirstaða og þá vissi hann að öllu var óhætt og sama hvað var hoppað allt stóð fast og öruggt.

Munum að: Góð undirstaða er nauðsynleg, bæði fyrir húsin sem við búum í og lífið sem við lifum.