María Gunnarsdóttir – Síða 27 – Efnisveita kirkjustarfs

Gott er að vera búinn að æfa frásögnina áður en samveran hefst, því það er skemmtilegra að endursegja hana með eigin orðum en lesa upp af blaði.

Sjá glærurnar í viðhenginu hér fyrir neðan.

Mynd 2a

Hefur þú týnst? (Leyfa börnunum að svara).

Það er erfitt. Það er bæði erfitt fyrir börnin ef þau týnast og líka mömmu og pabba sem finna ekki barnið sitt.

Í dag fáið þið að heyra söguna af því þegar María og Jósef týndu Jesú þegar hann var tólf ára gamall. Jesús hafði fengið að fara með mömmu sinni og pabba til borgarinnar Jerúsalem. Það var mjög spennandi, vegna þess að Jerúsalem var stór borg. Þau fóru gangandi alla leið, ásamt mörgum vinum sínum.

Mynd 2b

Það var margt fólk í Jerúsalem og Jesús naut þess að skoða borgina ásamt mömmu sinni og pabba. Jesú fannst gaman að skoða helgidóminn í borginni, enda var hann mjög stór og þangað fóru allir til að tala við Guð. Vitið þið hvað helgidómur er? (Leyfa börnunum að svara). Það er hús Guðs.

Þegar fjölskyldan var búin að vera nokkra daga í Jerúsalem kom að því að þau þurftu að fara heim aftur. María og Jósef lögðu af stað. Jesús var ekki með þeim en þau voru sannfærð um að hann væri líka lagður af stað í hópi vina þeirra. Þegar þau höfðu ferðast heilan dag komust María og Jósef að því að Jesús var ekki með. Hann var týndur. Þau urðu mjög hrædd og fóru til baka til Jerúsalem.

Mynd 2c

María og Jósef leituðu að Jesú í þrjá daga.

Hvernig haldið þið að pabba ykkar og mömmu myndi líða ef þið væruð týnd í þrjá daga? (Leyfa börnunum að svara).

Þau voru mjög hrædd um drenginn sinn. Kannski hafði honum verið rænt! Haldið þið að Jesú hafi verið rænt? (Leyfa börnunum að svara). Nei!

Jesús hafði orðið eftir í borginni, hann hafði orðið eftir í helgidóminum.

Vitið þið hvað hann var að gera? (Leyfa börnunum að svara).

Hann var að tala við prestana í helgidómnum. Honum fannst svo merkilegt að spyrja þá um trúna á Guð og þeir voru líka mjög hrifnir af þessum tólf ára strák sem vissi ótrúlega mikið um guðsríki.

Mynd 2d

Það voru allir glaðir nema María og Jósef. Þau voru hrædd, þangað til að þau komu í helgidóminn og fundu Jesú. Þau urðu strax fegin en líka svolítið reið. María spurði Jesú hvernig stæði á því að hann gerði þeim þetta, þau hefðu verið orðin svo hrædd um hann. Jesús varð undrandi og sagði við mömmu sína að hann hafi verið áfram í helgidóminum af því að Guð væri pabbi hans og helgidómurinn væri hús Guðs, hvort hún vissi það ekki?

María mundi að Jesús væri sonur Guðs, en hún var samt hrædd um strákinn sinn. Jesús fór heim með mömmu sinni og pabba og var alltaf mjög hlýðinn. En María og Jósef hugsuðu oft um þennan atburð sem hafði minnt þau á að Jesús var alveg einstakur og sonur Guðs.

*Ef þið eruð ekki með skjávarpa þá er þessi saga tekin úr Stóru flettimyndabiblíunni með forsíðumynd af Jesú og börnum.