Lúthersrósin – eða merki Lúthers – samanstendur af 4 þáttum:
1. KROSS í miðju 
2. HJARTA í miðju
3. RÓSAR inni í
4. HRING utan um.
Krossinn
Krossinn í miðjunni er svartur og vísar til krossfestingar Jesú. Minningin um dauða Jesú og krossfestinguna er miðlæg í öllu sem Lúther sagði og skrifaði. Svarti liturinn vísar líka í það sem er erfitt og brýtur manneskjuna niður. Krossinn stendur sem áminning um að án trúar á Jesú verður manneskjunni ekki bjargað. Í augum Lúthers er það fagnaðarerindið sjálft og hann vísar í ritningarstaðinn Róm 1.17: ,,Hinn réttláti mun lifa fyrir trú.”
Hjartað
Hjartað utan um krossinn er rautt. Hjartað er tákn fyrir kjarna manneskjunnar, tilfinningar hennar og innstu veru. Lúther vill leggja áherslu á að trúin verður til í hjartanu, þ.e. tilfinningunni um það sem skiptir mestu máli. Hjartað stendur fyrir manneskjuna eins og hún er og það sem hún þráir. Hér vísar hann í ritningarstaðinn Róm 10.10: ,,Með hjartanu er trúað til réttlætis” – eða í þýðingu Guðbrandsbiblíu 1584: ,,Því að nær vér trúum af hjarta verðum vér réttlátir.” Það er úr þessari þýðingu sem yfirskriftin að þessu efni er tekin (trúum af hjarta…)
Rósin
Hjartað er staðsett inni í hvítri rós og hvíti liturinn táknar að manneskjan sem hvílir í trú, upplifir gleði, huggun og frið. Hún er vernduð gegn ótta og hættu með þessari hvítu rós, sem táknar líka vonina um að það er gott í vændum. Þarna vísar Lúther í ritninarstaðinn Jóh 14.27: ,,Frið læt ég yður eftir, minn frið gef ég yður. Ekki gef ég yður eins og heimurinn gefur. Hjarta yðar skelfist ekki né hræðist.”
Hringurinn
Utan um hvítu rósina er gylltur hringur sem táknar himininn og eilífðina – eða vonina um hið góða sem sá eða sú sem trúir, á. Gull er dýrmætasti málmurinn, og þessi von er það dýrmætasta sem manneskjan getur eignast. Gyllti hringurinn lokar þessari mynd af guðfræði Lúthers og skýrir hvernig TRÚIN er GJÖF frá Guði sem breytir öllu fyrir manneskjuna. Hér á ritningin úr 1. Pét 1.3 vel við: “Lofaður sé Guð og faðir Drottins vors Jesú Krists sem eftir mikilli miskunn sinni hefur endurfætt oss til lifandi vonar fyrir upprisu Jesú Krists frá dauðum.”
1517-2017 – 500 ár
Hvað þýða krossinn, hjartað, rósin og hringurinn fyrir okkur í dag? Æskulýðsdagurinn árið 2017, 500 árum eftir að Lúther er tilefni til að skoða hvernig boðskapur Lúthers og siðbótarinnar passar fyrir okkur hér og nú. Í guðsþjónustunni og samverunum fyrir æskulýðsdaginn ætlum við að vinna með þessar hugmyndir siðbótarinnar og hvernig trúin birtist í lífinu í dag.
Viltu fræðast meira?